ახალი საბაკალავრო პროგრამა
"გამოყენებითი ბიომეცნიერებები და ბიოტექნოლოგია"

აგრობიოტექნოლოგია

 

აგრობიოტექნოლოგია წარმოადგენს ბიოლოგიის დარგს, რომელიც ფოკუსირებულია აგროკულტურების წარმოების ყველა ასპექტზე დაწყებული მცენარეთა შეჯვარებიდან და გამრავლების მეთოდების სრულყოფიდან, დამთავრებული საკვების, საკვები ინგრედიენტების, ფარმაცევტული პრეპარატების და ნედლი მასალების წარმოებით.

 

აგრობიოტექნოლოგიის ქვეპროგრამა შედგენილია მცენარეული კულტურების და ფერმერული სისტემების განვითარებისათვის მსოფლიო სამეცნიერო მოთხოვნების შესაბამისად. წარმოების ტექნოლოგიურ ასპექტებთან ერთად მცენარეთა ბიოტექნოლოგია მოიცავს მნიშვნელოვან გარემოსდაცვით, ხარისხის, ჯანმრთელობის, სოციალურ-ეკონომიკურ და ინფრასტრუქტურულ ასპექტებს. ინტერდისციპლინურობა პროგრამის მთავარი მახასიათებელია. აგრობიოტექნოლოგიის ქვეპროგრამით სწავლის პროცესში სტუდენტები შეისწავლიან: აგროკულტურების წარმოებას, ცხოველთა მაღალპროდუქტიული ჯიშების გამოყვანისა და სელექციის მეთოდებს; მცენარეული და ცხოველური წარმოშობის საკვები და არასაკვები პროდუქტების წარმოებასა და გამოყენებას; ტექნოლოგიური და ეკონომიკური პრობლემების იდენტიფიცირების პრინციპებს და მათი გადაჭრის გზებს; აგრომენეჯმენტის ძირითად პრინციპებს.

თეორიული ცოდნის შეძენის კვალდაკვალ, პრაქტიულ მეცადინეობებზე სტუდენტები აქტიურად იმუშავებენ სასწავლო–კვლევით ლაბორატორიებში. აგრობიოტექნოლოგიის მრავალფეროვანი კურსი მოიცავს ჯგუფურ დისკუსიებს და პრაქტიკულ გასვლებს აგრომეურნეობებში.

 

პროგრამის კურსდამთავრებულებს ექნებათ ფუნდამენტურ და გამოყენებით მეცნიერებებში საჭირო უნარები აგრარული და ბიოტექნოლოგიის სპეციალიზაციით და შეეძლებათ კომპლექსური პრობლემების ინტეგრირებული გადაწყვეტის უანრი.

დასაქმების სფეროები:
•     აგრო–წარმოების მოწყობის სამსახურები;
•     სახელმწიფო/კერძო კვლევითი და საკონსულტაციო სამსახურები;
•     სამეცნიერო–კვლევითი ინსტიტუტების შესაბამისი პროფილის ლაბორატორიები;
•     ექსპერტიზის სამსახურები;
•     კვების მრეწველობის და სასოფლო–სამეურნეო პროფილის კერძო კომპანიები.

კურსდამთავრებულები შეძლებენ გააგრძელონ სწავლა მაგისტრატურაში ბიოლოგიის, ტოქსიკოლოგიის, სოფლის მეურნეობის, კვების და სხვა მომიჯნავე სპეციალობების სამაგისტრო პროგრამებით.